Nýjar myndir frá Brokki og skokki.

Það eru komnar inn nýjar myndir í myndaalbúm, hér til hægri á síðunni. Myndaalbúmið heitir Brokk og Skokk. Njótið myndanna og hugið að undirbúningi fyrir næsta ár.

Næsta sunnudag, þann 23. júní verður blásið til nýstárlegrar keppni sem við kjósum að kalla Brokk & Skokk. Brokki & Skokki verður hleypt af stokkunum við Skaftholtsrétt kl. 14:00. Keppnin er fyrir alla, jafnt fjölskyldur sem þjálfaða íþróttamenn, unga sem aldna. Tveir knapar og einn hestur er í hverju liði. Markmiðið er að koma fyrstur í mark eftir ákveðna leið þar sem knapar skiptast á að vera á baki, en ganga þess á milli.

Hér fyrir neðan má sjá reglugerð sem gildir fyrir keppnina, sem og upplýsingar um skráningu vegna þáttöku.

Nauðsynlegt er að skrá knapa og hross á netfangið brokk.og.skokk@gmail.com fyrir miðnætti föstudaginn 21. júní.

Reglugerð Brokks & Skokks.

Reglugerð fyrir Brokk & Skokk sem haldið er þann 23. júni 2013 í Skaftholtsréttum (byggt á reglum Ride and tie).

1. Hvert lið samanstendur af einum hesti og tveimur knöpum.

2. Knöpum á hestbaki er skylt að bera viðurkenndan öryggishjálm.

3. Allir þátttakendur og aðstoðamenn í braut skulu klæðast öryggisvestum á meðan á keppni stendur, sem aðstandendur keppninnar útvega.

4. Beislabúnaður með tunguboga er ekki leyfilegur.

5. Fjölskyldurhringurinn er um það bil 2,8 km að lengd. Í honum eru engar skiptistöðvar og má skipta um knapa hvenær sem er. Ekki er leyfilegt að binda hest úti á víðavangi og fara frá honum. Heimilt er að teyma undir börnum yngri en 8 ára allan hringinn. 

6. Íþróttahringurinn er um það bil 6 km langur. Í honum eru fimm stöðvar þar sem aðstoðarmenn halda í hesta. Skipta verður um knapa á að minnsta kosti fjórum skiptistöðvum. Auk þess má skipta um knapa úti á víðavangi að vild. Þó er ekki leyfilegt að binda hest úti á víðavangi og fara frá honum.

7. Aðstoðarmaðurinn á skiptistöð getur neitað að halda í hest ef hesturinn lætur illa eða ef hann heldur í fleiri en 4 hross.

8. Aðstoðarmenn á skiptistöðvum eru ávallt 3 eða fleiri.

9. Það lið sem kemur fyrst í mark í heild sinni vinnur keppnina.

10. Ávallt skal hafa velferð hesta í huga og verður liði vísað úr keppni ef vart verður við grófa reiðmennsku.  

Vegna dræmrar þátttöku verður ekkert af áður auglýstu íþróttamóti Smára og Loga og sameiginlegu töltmóti Smára, Loga og Trausta.