Á þrettándanum (06.01.2007) tóku fimm heiðursfélagar í Hestamannafélaginu Smára fyrstu skóflustunguna að reiðhöll sem byggð verður á Lambatanga á Flúðum. Reiðhöllin sem mun rísa skammt frá Límtrésverksmiðjunni verður 22 x 50 m. að grunnfleti. Gert er ráð fyrir áhorfendabekkjum fyrir um 150 manns, hesthúsi fyrir 10 -12 hross, félagsaðstöðu fyrir Smárafélaga, snyrtingum ásamt geymslu. Burðarvirkið verður úr Límtré sem klætt verður svokölluðum yleiningum. Eignarhaldsfélag hefur verið stofnað um húsið og eru eigendur auk hestamannafélagsins, sveitarfélögin á þessu svæði, Búnaðar og Hrossaræktarfélög Hrunamanna ásamt fleirum. Í ávarpi sem Guðni Árnason form. félagsins flutti við þetta tækifæri sagði hann finna fyrir vakningu hjá félagsmönnum, fólk er spennt að að sjá húsið rísa sem mun lyfta hestamennsku og hrossarækt á félagssvæðinu á annað stig en húsið býður uppá fjölmarga möguleika sem fjölnota menningarhús. Búið er að skipuleggja keppnisvöll ásamt beinni braut og æfingavelli skammt frá væntanlegri reiðhöll en þær framkvæmdir muni bíða um sinn. Gröfutækni ehf á Flúðum annast jarðvinnu, Þorsteinn Loftsson byggingameistari um steypu sökkla og aðra steypuvinnu.